Brenda dy javësh pritet të hyjnë në fuqi ndryshimet në ligjin për pronat. Autoritete zyrtare nga dikasteri i Drejtësisë, konfirmojnë se këto ndryshime pritet të fuqizohen sa më parë dhe në fillim të muajit qershor të hartohet metodologjia e re, prej së cilës do të dalin edhe çmimet e reja të kompensimit të pronave. Burimet zyrtare nga ministria, pohojnë se zgjatja e afatit të Agjencisë së Kthimit dhe Kompensimit të Pronave, e cila aktualisht me ligjin e vjetër ka pushuar së funksionuari, do të shërbejë veçanërisht për të zgjidhur çështjen e 6500 dosjeve. Bëhet fjalë për raste të komplikuara, të cilat sollën edhe nevojën e ndryshimeve brenda ligjit, me qëllim përshpejtimin e këtij procesi. Ministria e Drejtësisë ka deklaruar publikisht se metodologjia e re e pronës pritet të miratohet nga Këshilli i Ministrave në fund të muajit qershor. Kurse përfaqësues të ish-pronarëve shprehen se gjatë kësaj periudhe po zhvillohen konsulta të gjëra me ekspert të Ministrisë së Drejtësisë me qëllim finalizimin e një metodike në interes të subjekteve.